Luke 5

Lorotoro At Ne Iesu Ti Luvuttadi Loklok Ka Anasa

(Mt 4:18-22; Mk 1:16-20)

1At lara laaleng Iesu ga tu to loxon at lavatdan kis Genesaret, la limixin diga esi kakape kusu uto saparav i, kusu dina ronga levelinga at ne Moroa. 2Ni ga ven legepu sepang to loxon, la luvuttadi sepsep mat no diga lok li vam du la digat gos laxatkat atdi. 3Iesu ga los kas at lara lesepang (neni lesepang at ne Simon) la ga tong i ri ne Simon kusu na so asu silatla lesepang basinge loloxon. Simon ga lox i kuren, la ne Iesu ga xis ap mo lesepang la ga anasa limixin.

4Se neni ga vaase axap, ni ga lok ti ne Simon, “So asu silatla lesepang taram uto vaxalom lixilik at lisimaramain, la nenu eburu mi larapen tangas taram mina lox asi laxatkat atnimi ukopok kusu mina loloa.”

5Simon ga lok tin, “Leeme silok, ma gugu lolos at na laaleng kanimin axap la maxo sep ka tenmat. Ketla, mo do u tong pam i, aba lox asi laxatkat.”

6Diga lox asi laxatkat, la laxatkat ga umsu mi laxanmat solo, la laxatkat ga lok do na rekoxorop ta. 7La diga xalim ka larapen tangas atdi to at lara lesepang petpes kusu dina vosiga di la dina lok tooro di; diga vot la diga suxa buru nom lesepang mi laxanmat la ma lixilik diga lok do dina dong si.

8Simon Pita eburu mi larapen tangas teren, diga sangu aleng at laxanmat diga loloa xaka i. Lumdak bok at ne Sebedi, Jems mi ne Jon duga sangu aleng. Se ne Simon Pita ga ven na lavanga ga vot, neni ga xis tiktikbu mi luvatgulom teren to melamgo at ne Iesu la ga lok, “Leeme Silok, uto u basinge ia! Nia laradi xapmek!”

Iesu ga lok ti ne Simon, “Nemen uta marat. I ru ka i lingina uba loloa ka limixin!” 11Digatla oso mi lesepang uto loxon, la diga on basinge lempanga axap, la diga mumu asu ne Iesu.

Iesu Ga Lox Aroo Lara Laradi

(Mt 8:1-4; Mk 1:40-45)

12At lara laaleng Iesu ga nemen to at lara lemenemen; laradi ga meres mi lanmeres gu, mo ga umsu at labantuxu ren. Se neni ga ven ne Iesu, ni ga xis tiktikbu mi luvatgulom teren la ga sing ne Iesu, “Leeme Silok. Mo do u vara i, una lox aroo ia!”

13Iesu ga song asu mi lekngen la ga long tu ren, la ga lok tin, “A vara i. Lanmeres taram na xap ta.” La soso mun mo lanmeres ga xap basinge mo laradi.

14Iesu ga vaase lolos tin, “Nemen uta tong box i na ri tara, ketla unat pas uto at lamaasa, la neni na ven mumu u; melemu una lok laramtaba ram ti ne Moroa ngan ne Moses ga tong i, kusu ri lox asuusu i ri limixin axap do nenu mo ura lox avukat ta.”

15Ketla levelinga mumu ne Iesu ga rem teles ampana uto at lengkot axap, la buaang limixin diga vot kusu dina ronga i la kusu neni na lox aroo nedi basinge levenanmeres atdi. 16Ketla amisik neni gat pas uto at lengkot mimila, kusu na ngising.

Iesu Ga Lox Aroo Laradi Labantuxu Ren Ga Molo

(Mt 9:1-8; Mk 2:1-12)

17At lara laaleng ne Iesu ga anasa; lentaba lubung Parisi la luvuttadi loklox ase at Lenavolo mo digat kis, diga laa boro at laramenemen axap to Galili la boro bok Judaia, la boro bok Jerusalem. Lololos at ne Moroa ga umsu ren kusu na lox aroo levenanmeres. 18Lentaba luvuttadi digap kip lara laradi mi loora, labantuxu ren ga molo axap la diga lok tong i do, dina xip ka i uto xeneng at loogu la dina vaxamdi i ro melamgo at ne Iesu. 19Ketla buaang nedi limixin diga umsu, la di goxo epovo kusu dina lox abeles lanmeres ukeneng. Kuren la diga xip kaka i upana at lavatlak gu, la diga lok das lenep teren, la diga lox asi lanmeres mi loora ren ukopok la diga lok li i ro melamgo at ne Iesu, kantubu at limixin.

20Se ne Iesu ga ven kisip lunuunu atdi, neni ga lok ti nom laradi, “Lentangas tarak, leveloklok kakapmek axap taram, a doxoma xepe i.”

21Luvuttadi loklox ase at Lenavolo eburu mi lubung Parisi diga epaase kantubu atdi xeretna, “Nege i na laradi i paase vupu ri ne Moroa xeretna? Kopmen teta i epovo kusu na doxoma xepe laxapmek at tara; Moroa xusuk mun i epovo!”

22Iesu gaklen levendoxoma atdi la ga lok tidi, “Tila lodoxoma atnimi i ekarakat mumu na lavanga? 23Ua levelinga kopmen na lolos ti tong i; leveloklok kakapmek taram ara doxoma xepe vam i, kopla ana tong i do, katu kaxat la unat pas? 24Ketla a vara i do minaklen i do, nenia, Laradi Mevana, a ruuna lololos at na lavatbung menemen kusu ri doxoma xepe leveloklok kakapmek!” La ne Iesu ga lok bok ti mo laradi xeretna, “A tong i ru, una xatu upana la una xip kaka loora ram la una vas kaxat ukolonu.” 25La soso mun mo laradi ga xatu kaxat to melamgo atdi axap, la ga lok ka loora mikmidi ren, la gat pas ukolonu, ga emi asu mi ne Moroa. 26Nedi axap diga sangu. La diga lingun, diga emi asu mi ne Moroa, la diga lok, “Lavanga vetpes dik dira ven i lingina!”

Iesu Ga Ro Ka Ne Levi

(Mt 9:9-13; Mk 2:13-17)

27Melemu at nai, Iesu ga vas kaxat basinge mo lenep la neni ga ven laradi loklok ka pilas laasen teren ne Levi, gat kis to at loogu xekepe pilas. La ne Iesu ga lok tin, “Una mumu asu ia.” 28La ne Levi ga xatu kaxat, ga ke xepe lempanga axap, la ga mumu asu ne Iesu.

29La ne Levi ga lok leluxa silok to at loogu ren do ri ne Iesu, la buaang nedi luvuttadi loklok ka pilas eburu mi lentaba luvuttadi bok, mo digat kis eburu min kusu ri anan. 30Lentaba atnedi lubung Parisi la lentaba bok atdi luvuttadi loklox ase at Lenavolo, diga vaase kuxurung ti luvuttadi loklok ka anasa at ne Iesu. Diga sue xeretna, “Tila mi anan la mi inin eburu mi luvuttadi loklok ka pilas la limixin kapmek bok?”

31Iesu ga ronga i nom la ga lok tidi xeretna, “Limixin di lox avukat, kopmen dinak pakes ti loklok tooro, ketla nedi xusuk mun dik meres. 32Aga rupot kusu ri ro xaka limixin bilinga kusu dina leeng, la kopmen nia a goxo rupot kusu rinedi limixin mokmokso.”

Lususue Mumu Loklok Ti Mun Anan

(Mt 9:14-17; Mk 2:18-22)

33Lentaba luvuttadi diga lok ti ne Iesu xeretna, “Luvuttadi loklok ka anasa at ne Jon di mun anan amisik, la di ngising amisik, la luvuttadi loklok ka anasa bok at lubung Parisi di mun anan; ketla luvuttadi loklok ka anasa ram kopmen dina mun anan.”

34La ne Iesu ga vorang i ridi mi lavapaase poovo xeretna, “At loklox anarong ti leepot, lentaba at laradi epot di noxo mun anan mila laradi epot move ik lox eburu midi. 35Ketla laaleng move naba rupot la limixin petpes diba lam ka laradi epot basinge lentaba ren la dina mun anan ba ap mo levenaleng.”

Lempapaase Poovo Mumu Levenanasa Maxat At Ne Iesu

36La ne Iesu ga vaase bok tidi mi lavapaase poovo xeretna, “Kopmen teta na balais ka loxontamon maxat kusu na sok gatgat pe lamamara at labantamon maut; mo do neni na lox i xuren, labantamon maxat ira lok kapmek pam la kopmen na epovo bok ba xusu ata ba lok tavanga min; la nom loxontamon maxat noxo epovo xusu na lok pe avukat lamamara at loxontamon maut.” 37La ne Iesu ga vaase bok tidi mi lavapaase poovo. Ni ga lok keretna, “Kopmen tara na soli li laxadan vaen maxat uto xeneng ti labantuxu at lavatme i maut pam. Mo do neni na lox i xuren, mo labantuxu maut ba repagam la laxadan vaen naba soli su ukamang, la labantuxu maut naba lok kapmek. 38Laxadan vaen maxat mina soli li i at labantuxu maxat! 39Kopmen tara i vara laxadan vaen maxat melemu do ni ira in pam laxadan vaen maut, neni ba lok, laxadan vaen maut i lox avukat.”